13 rajab ka juloos, masla-e-zainabia aur qaum ke jawaan - Roman

13 rajab ka juloos, masla-e-zainabia aur qaum ke jawaan

Agar hame kisi qaum ke zinda ya murda hone ki jaach karni hai to dekhna hoga ki uske jawan kin muddo ko le kar hassasiyat dikh rahe hai. Agar muaashre me jin points par baat chal rahi hai wo qaum ke bhalai ke liye hai aur un muddo par qaum ke buzurgo aur ulema ke sath hai to samjhe ki qaum ek sahi raah par aage badh rahi hai; lekin agar jawan taish me aa kar koi mudde ko apne man se, aur baghair kisi buzurg / aalim ke hassasiyat dikha rahe hai aur use jeene ya marne ki baat samajh rahe hai, to samjhiye ki qaum ki leadership sahi hatho me hai hai aur future saaf nazar nahi aa raha hai.

Pichle dino Mumbai me hue kuch hadesaat is baat ki taraf ishara karte hai ki hamari qaum k ijawano ki taraf buzurgaan aur ulema ko khas dhyan dene ki zarurat hai. In sab me sare fehrist hai jawano ki tarbiyat aur dusre mazahib se rishte naate rakhne ke aadaab.

Har saal ki tarah is saal bhi youme wiladat-e-Imam Ali (a) ke roz ek pur josh juloos Mumbai ke dongri ilaaqe me nikla. Yaad rahe ki Mumbai ka Dongri ilaqe me Musalmano ke sabhi maslak aur fikr ke log rehte hai, jinme Shia, Sunni, Bohri, Aghakhani aur digar log ek sath mil kare rehte hai. Aise mahol me hamare taraf se zara si bhi naadani ek amn wale mahol ko firqaparast tanaw me tabdeel kar sakti hai.

Pichle saal ke 13 Rajab ke juloos me qaum ke kuch jawaan aur bachche ek sochi samjhe tarike se Ahle Sunnat ke muqaddesat ko lanat malamat karte nazar aae the, jiska video YouTube par bhi post kar diya gaya tha, jiski wajah se qaum Shia Sunni tanaw se baal baal bachi thi. Is sanihe ke baad chahiye ye tha ki qaum ke buzurgaan aur olema baith kar is bare me sochte ki aisi halat kyu aai ki qaum ke jawaan aur bachche bina kisi jhijhak ke dusre qaum par lanat malamat karne par aamada ho gae. Aur agar hue bhi to phir inhe wapas kis tarah shant kiya jaae. Lekin afsoos, aisa kuch hua nahi aur ek saal guzar gaya.

Is saal phir usi roz, jis din kaaenaat ka maula aur aqa ki wiladat hai aur jisne duniya me rehne wale sabhi insaano ke sath jine ka tariqa sikhaya, usi din hamare qaum ke jawaan raasto par nikalte hai aur dusro ke muqaddesaat ke sath sath khud hamare Shia ulema par lanat malamat ka silsila jaari ho jata hai. Is saal ek aur kadi is gaali galoch me shamil ki jaati hai aur wo hai “Bohri samaj ke sarparast, sayyadana sahib” ki shaksiyat.

Hamare jawaan jab bohri mohalle me moujood Zainabia imambada pahuchte hai, jo ki bohri jamat ka markaz hai; Sayyadana sahib ka naam le le kar lanat bheji gai. Jab wajah puchi to kaha ki Imambada Zainabia ki kharid aur farokht me wo shamil hai, isliye ek shia jawan ko ye haq hasil hai ki wo un par gaali galoch aur lanat malamat kar sakta hai.

Yaha par sochne ki baat ye hai ki masla zainabia imambada ki kharid aur farokht ka hai, jo ki qaum ke zimmedaro aur ulema ke tahat aata hai, na ki jawano ko ye haq hasil hai ki wo qaum ke buzurgo aur dusre mazhab walo ko bura bhala kehte fire.

In sab ke chalet hua wohi jiska dart ha. Us juloos me jo bohri sayyedana ko jo bura bhala kaha rahay tha uski video clip viral ho gai aur bohri biradari me ja pahuchi; jisko le kar bohri jamat ne police me case darj karwaya. Police ne bhi video me mulawwis shaks ko giraftaar kar liya fir baad me bail par use riha kar diya gaya.

Baat yahan giraftaar karne aur bail pe chutne ki nahi hai, balki do maslako ke bich ke rishto ki hai. Musalmano me bohri biradari aur Shia Hazraat me kaafi gehre taalluq rahe hai. Wo hamari majliso matamme aate hai aur bahot si jaghe aisi hai jaha hamare maulana unke gharo par majlise padhne jaate hai. In sab se tableegh ka silsila khula hua hai aur hamne dekha ki isi Mumbai shahar me Mazgaon par jo bohri shia imambada hai waha aksar wo log aate hai jo pehle bohri the.

Agar gaali galoch aur lanat malamat se mamle hal hua karte to deen aur mazhab me hikmat aur saleeqe ki raah ko badhawa nahi diya jaata. Lekin afsoos, aaj hamare jawaan ko deen ke naam par gaali galoch aur lanat sikhaya gaya aur aisi hadise pesh ki gai jisse ye fikr aam ho.

In sab ke beech qaum ka ek aham tabqa abhi tak is mauzu par kuch bhi bolne ke liye raazi nahi hai aur apni zimmedariyo se jaan chudaae roz marra ke amaal me laga hua hai, aur wo hai qaum ke ulema. Jawano ki rehnumai karna aur unko sidhe raah par lana ulema ka kaam hai. Agar jawan nahi sun rahe to nae nae nuskhe aur raaste nikaal kar jawano par kaam karna ek aham zimmedari hai. Ye keh kar khamosh nahi baitha ja sakta ki jawan sunte hai.

Bazaar me agar koi naya product aata hai to use public ki zindagi me lane ke liye marketing companiya na jaane kitne jatan kar ke paise kharch kar ke use bechti hai, tab ja kar company ko munafa hota hai. Aaj deeni fikr ki tarweej ke liye bhi zimmedaraan ko jawano tak pahuchne ke liye nae nae tarikekaar sochne ki zarurat hai. Qaum me alhamdulilah aise bahot se ulema hai jo apne ilqao me zabardast kaam kar rahe hai, lekin aksar o beshtar apne juma ke khutbe ko bhi sahi tariqe se istemaal kar paane me qasir nazar aate hai. Aaj waqt hai ki ulema is nehej par soche ki aane wali naslo ko kis tarah training di jaae ki wo qaum ka naam kharab karne ki jagah qaum ke naam ko ucha kare.

Isi ke sath jawano ko bhi samajhne ki zarurat hai ki hindustaan me rehte hue kisi bhi maslak ya mazhab ko gaali galoch ya lanat malamat kar ke samaji satah par zindagi nahi guzari ja sakti. Aisa sochna galat hi nahi balki ijtemaai khudkushi hogo. Hamare dusri qaumo ke sath jitney achche rawabit rahege, utna hame dusro par kaam karne ka mauqa milega aur deen ki tableegh hogi aur sath hi is duniya me achche dost aur padosi milege.

Aaimma (a) ki zindagi me hame har lamha aise marahil milege jisme wo kisi yahudi, kafir, ahle sunnat yaha tak kisi dehriye ke sath bhi achche suluq karte nazar aate hai. Phir ye hamari qaum ko achanak kya hogaya, ki puri insaaniyat ko lanat karne par aamada hogai? Ye bimaari kaha se aa lagi ke chunki ham Ahlebait (a) ke maannewale hai to hame ye haq hasil hai ki ham dusre sabhi ko gaali galoch / lanat malamat karne ka haq rakhte hai? Ye ek niche soch hai aur isse hame ubharna hoga aur is silsile me qaum ki rehnumaai ulema keraam hi kar sakte hai.

Inshallah umeed hai ki ulema apni zimmedariyo ko samjhege aur qaum ke saamne sahi raahe hal rakhne ke saath ise aage bhi bhadhaege aur qaum ke jawaan apne ulema ki izzat o waqar ko sarbuland rakhte hue diye gae farmaan par amal paira hoge. Inshallah jald ham dekhege ki hamari qaum sarbuland hogi aur dusri qaumo ke logo ko apni taraf aakarshit karte hue deen ke paigham ko saari duniya me failaegi.