Imam Hussain (a) ek aisi shaksiyat hai jo zulm ke khilaaf ek mazboot diwaar nazar aate hai. Aap (a)
ki wiladat hijrat ke baad Madina Munawwara me hui jaha Rasul-e-Akram (s) ne
Allah ke Qanun ki bina par ek Ilahi nizaam ka qiyam kiya tha.
Wo aisa waqt tha jab
kuffar-e-Makka Madina par tarah tarah ke zulm kar rahe the aur ek ke baad ek
hamle kar rahe the. Apne bachpan me hi Imam Hussain (a) ne apne walid, Imam Ali
(a) ko kuffar ke zulm ke khilaaf muqabla karte hue dekha. Jange Badr ho ya
Jange Ohad, Khandaq ki jang ho ya phir Khaibar ki jang; yaha tak ki khud Islami
Nizaam me maujood galat logo ke khilaaf khade hona. Imam Hussain (a) ko bachpan
se yehi dars mila tha ki Zulm kahi bhi ho, uske khilaaf baithna jurm hai aur
uske khilaaf qayam ek zaruri amal hai.
Apni jawani ke dino me aapne khud Jange Jamal,
Jange Siffin aur Jange Naharwan me hissa liya aur munafiqin ke khilaaf dat kar
ladhai kari. Yeh ek aisa zulm tha jo mamleqat ke andar se paida hua
tha, jiska khatma ek bahot bada amal tha. Imam Ali (a) ki shahadat ke baad Imam
Hasan (a) ki Imamat me bhi aapne hamesha apne bade bhai ki himayat ki aur unke
hukm ko manne me koi kami nahi chodi. Jange Siffin ke baad jab Imam Hasan (a)
ne sahabiyo ki kami ki wajah se Muawiya ke sath sulh kari; tab Ahlebait (a) ke
gharane ne khoon ke ghoot piye jisme
Imam Hussain (a) ko utni hi taklif hui jitni Imam Hasan (a) aur Janabe Abbas
(a) ko hui.
Imam Hasan (a) ki shahadat ke baad Imam Hussain
(a) ne apne aap ko bade sabr se sambhala aur apne bade bhai ke wade aur sulh ki
sharto ko qayam rakha aur Muwaiya ke khilaaf koi qayam nahi kiya. Lekin yeh
chand saal Imam Hussain (a) ke liye aise guzre jaise aankho me kaanta chubh
gaya ho. Is zamane me Imam Hussain (a) apne sahabiyo par kaam kar rahe the aur
ummat ko zulm ke khilaaf bedaar kar rahe the. Aapki puri zindagi me aisa kabhi
nahi hua hoga ki Imam Hussain (a) zulm se bekhabar ho kar aaram se baithe ho.
Muawiya ki maut ke baad jab uske bete Yazid
(la) ne khilafat ki dawedari rakhi, tab Imam Hussain (a) ne awaaz buland kari
ke ab is zulm ke khilaaf khamosh baithna jayaz nahi. Phir kya dekhna tha, maano puri
Islami mamlekat me bhuchal sa aa gaya aur takhte Shaam tharrane laga. Puri
duniya se fauj pe fauj aane lagi aur Rasul (a) ke nawase ke khilaaf saf bandi
hone lagi. Lekin is nawasa-e-Rasul ki rago me wo lahu beh raha tha jisne kabhi zulm ke
khilaaf dar ke baithna pasand nahi kiya.
Apne sathiyo ki kam tadaad ke hote hue
bhi Imam Hussain (a) ne apne farize ko nahi bhula aur Zulm ke khilaaf is tarah
lade ki aaj tak Zulm ke khilaaf jitni bhi awaaze uth rahi hai, sab kahi na kahi
ja kar Imam Hussain (a) se sabaq le rahe hai. Phir wo Mahatma Gandhi ho ya
Nelson Mandela, Musalman ho ya Kafir, sabhi ne Imam Hussain (a) se sabaq hasil
kiya aur Zulm ka dat kar muqabla kiya. Imam Khomeini (ar) farmaate hai ki
“zalim shah ke khilaaf qayaam, Karbala me Imam Hussain (a) ke liye hue qayam ka
ek silsila hai.” Aur sath me farmaate hai “Har chiz jo hamare paas hai,
Muharram ki wajah se hai”.
Jis Imam ne apni saari zindagi Zulm ka muqabla
karne me basar kari, hum unke manne wale hai aur hume bhi unke nakshe qadam par
zindagi basar karni chahiye. Asia na ho ki aaj ki surat e haal dekh kar
political faede ke liye hum zalim aur jabir baadshah / hukumat ke saamne ghutne
tek de aur ek dari hui qaum ban kar reh jaae.
Dekhna yeh hoga ki kahi koi aisa
group to nahi jo humari qaum ka naam istemaal kar ke "Shia People Party" ya "Shia
Personal Law Board" bana raha ho aur Zalim / khuni political leaders ke talwe
chat raha ho. Apne faaede ke liye Imam Hussain (a) ke mannewalo ke aqidat ka
sauda ek bahot ghinauna amal hai. Qaum ko apni hoshiyari ka saboot dete hue
aise logo ko aagah karna chahiye aur in harkato ko band karne ke liye har
mumkin koshish karni chahiye.
Tehrir: Abbas Hindi
0 comments:
Post a Comment