Ek Mubarak aur Khoobsurat Din…
17th Rabi-ul-Awwal
Jari Week of Unity ke dauran, Holy Prophet Muhammad (s.a.) aur Holy Imam Sadiq (a.s.) ki mubarak wiladat ka yeh din humein dawat deta hai ke hum apni soch ko wasee karein. Sirf apne aas-paas ke logon ke baare mein nahi, balki poori insaniyat ke baare mein sochein. Har us insaan ki kamyabi ke baare mein sochein jiske saath hum is duniya mein reh rahe hain, aur un aane wali naslon ke baare mein bhi jo hamare baad is duniya mein aayengi.
Yeh dono muqaddas hastiyan yaqeenan bahut mubarak hain, lekin saath hi tareekh ki sabse zyada mazloom hastiyon mein bhi shumar hota hai.
Nabi-e-Karim (s.a.) Rehmat-ul-lil-Aalameen bankar aaye. Lekin afsos, unke kuch pairvikaron ne unke paighaam ko sirf apne aqeede tak mahdood kar diya, khud ko hi wahid kamyab giroh sabit karne ki koshish ki aur doosron ko itna neecha samjha ke jaise unki zindagi ki koi ahmiyat hi na ho.
Isi tarah, woh Imam jo ilm ka sarchashma hain, jinhone Ummah ki is tarah rehnumai ki ke aaj koi bhi Musalman Imam Sadiq (a.s.) ki taleem aur Ahkaam se khud ko alag nahi kar sakta; jinhone apni ilahi rehnumai se mukhtalif Mazahib ke ilm ko parwan chadhaya — aaj unhi ke pairvikar ek doosre ko gumrah kehne aur sirf apne aap ko Allah ki taraf se hidayat-yafta sabit karne mein masroof hain.
Ek doosre ke baare mein badgumani aur nafrat apni inteha par hai, aur afsos ki baat yeh hai ke yeh sab kuch Deen-e-Muhammad (s.a.) aur Imam Sadiq (a.s.) ke mazhab ke naam par ho raha hai.
Isliye Unity sirf Juloos-e-Milaad mein shirkat karne, Ittehad par reels banane, do-chaar programs organize karne ya sharbat taqseem karne se haasil nahi hogi.
Unity insaniyat ki zaroorat hai — taaki hum ek doosre ke saath mil-jul kar reh saken, taraqqi kar saken aur haqeeqi kamyabi ki taraf badh saken.
Unity sirf ek slogan nahi hona chahiye, jise hum apni khwahish ko tasalli dene ke liye istemal karein ke hum un logon se alag hain jo nafrat phailate hain.
Jab hamare apne hi giroh ke kuch log Ahlulbait (a.s.) ke naam par Week of Hatered jaise bilkul mukhtalif aur nafrat bhare tasavvur ko shuru karne par tule hue hain, to ab waqt hai ke hum sochein:
Aakhir yeh muqaddas hastiyan humse kya chahti hain?
Humein chahiye ke hum unki taleemat ko samjhein aur insaniyat ki ijtimaai kamyabi ke liye milkar kaam karein — chahe woh samaji, maashi, roohani ya zindagi ke har pehlu ki kamyabi ho.
Yahi hamara asal maqsad aur United Goal hona chahiye.
Milaad-e-Nabi (s.a.) wa Imam Sadiq (a.s.) Mubarak!
💐💐💐
0 comments:
Post a Comment